Heb 12 | ATA | STEP | Ta mitema tatei latala ne milosienge no anu vote'i sou tamuxaxu tanenge mo ane'i mitulu mixalilinenge loxo tamuxala toxoxa'a. Aloxo ne la sou laixe lexe nenge tasu'anu mimii iouiou e tu'utu'umaxu xe susu iouiou e usakisakinenge la u'oxonenge taiave xavinenge uasi ne mo usu'a. Ia tatulu pekia'inge mo taiave no anu iaveiave sou uauli e Lataua musosovosinge sou taiave no anu.

a 12:11Ko 9:24-25

b 12:5-6Iop 5:17; Xav 3:11-12; Pal 3:19

c 12:7Lap 8:5

d 12:11Iak 3:17-18

e 12:12Ais 35:3

f 12:13Xav 4:26

g 12:16Tav 25:29-34

h 12:17Tav 27:30-40

i 12:18Mul 19:16-20; Lap 4:11-12

j 12:19Mul 20:18-21; Lap 5:22-27

k 12:20Mul 19:12-13

l 12:21Lap 9:19

m 12:24Tav 4:10; Eva 8:6

n 12:25Eva 2:1-3, 10:26-29

o 12:26Axa 2:6

p 12:29Lap 4:24, 9:3

Hebrews 12

Lataua Ulavusou Umomosi'a ta 'Olu

1 ^aTa mitema tatei latala ne milosienge no anu vote'i sou tamuxaxu tanenge mo ane'i mitulu mixalilinenge loxo tamuxala toxoxa'a. Aloxo ne la sou laixe lexe nenge tasu'anu mimii iouiou e tu'utu'umaxu xe susu iouiou e usakisakinenge la u'oxonenge taiave xavinenge uasi ne mo usu'a. Ia tatulu pekia'inge mo taiave no anu iaveiave sou uauli e Lataua musosovosinge sou taiave no anu. 2 La sou laixe lexe ienge ulai noxou Iesusi, Anu tava'u muxamuxaxu tanenge, mo ili'i la Anusi ulosinge nene'axu mii e temuxaxu tanenge no anu. Mo Anu mulavusou lexe umulinu masaxa noxou Latauasi, la ili'i la u'osa xe uxolu laixe manina. No mine Anu muxavutalanu la mutavulenu tu'umaxu la musoli no ovu valautu. Anu mutavulenu maela teitexi no ovu valautu, ia Anu uxavutala no anu uasi. Ia vaimomo 'o Anu muxolu no anu puloulou no pa'umolu Lataua no avolu tema 3 Loxo ngaxavutalanu maulixu Iesu la ngamaisou lexe ta mitema sou susu mixililiou, ia Anu mutulu pekia'u. Anu mu'oxonu aloxo ne la sou laixe lexe ngingi kalumo ngatotosa mo opongengi usalulu mamu, ngatulu pekia'inge. 4 Manina ngigni nge'oto xavingengi sou ngataloxolixu susu, ia no anu 'oto'oto ne la sialungenge unixi uao. 5 ^bLa sou loxovaa tangengi vulusiu peletoto noxou Lataua sou mu'oxonu pekia'inge loxo Anu ta 'olu. La anu kaukavu muai no nano no anu Lavuku Tavuna teinu muvikala aloxo 'o,

“'Alixeni, no mine Tila u'oxonu mii vile noxine,
la namaisou lexe mii vitanisi mamu,
mo no mine umomosine la oponeni tu'umaxu mamu.
6 Xo Lataua ulavusou umomosi'a ane'i ane Anu tanuxa'a,
mo no mine Anu uno'u itema vile xe umoxo'u lexe 'olu,
la Anu ulavusou upuasou kalumo.”
7 ^cAloxo ne la sou ngatulu pekia'inge no mine ngano'u tu'umaxu mo iengi uvaxa'u Lataua umomosinge loxo Anu ta 'olu. Loxovaa itema vile ulavusou upuasi'a ta 'olu no mine isusu uasi? Uasi anu umomosi'a. 8 Lataua ulavusou umomosi'a ta 'olu ukalusi. Ia lexe Anu umomosinge uasi, la anu laaxu lexe ngingi ta 'olu manina uasi. Ngigni ta 'olo vote'i. 9 Mo loxo ngamaisou, nenge ta maminge no lia 'o ilavusou imomosinge, la sou nenge tatoxone'i. Lexe nenge tataxane'i ta maminge no lia 'o laixe, la anu laixe sou nenge tamulinu maminge sou ulenenge, la sou nenge tamauli. 10 Ta maminge no lia 'o ne imomosinge maxuveeni uasi umomomo no anu masaxa noxi'asi. Ia Lataua umomosinge ne sou usu'ulinenge manina sou nenge tano'u 'ilixo malemalenga noxou. 11 ^dNo mine maminge ulosinge tu'umaxu sou umomosinge, la nenge ta'osasou uasi. Anu navunavu, ia ili'i la nenge tano'u lavulavu no anu, la taxolu se'isisi sou tamulinu 'ili'ilixo mulapusi la tano'u neneaxu ne anu ane opo se'isisi. 12 ^eAloxo ne, la sou lexe avonge musoisoli mo ulilili vitanisi la ngaavutinoxu utelo mo ngaxaxai no anu. Mo lexe tava'inge musoisoli la ngaavutinoxu mo ngatulu. 13 ^fMo ngamuamua'i no anu vote'i mulapu. Mo sou tava'inge e musoisoli ne usoisoli la uasi, anu uxali laixe la.

Loxo Taxiunu Tumalinge Noxou Lataua, La Tu'utu'umaxu Uxali Noxinge

14 Xavingengi sou ngatovo ngaxalixu xoluxolu laixe mo opo se'isisi noxi'a ta mitema ukalusi. Mo xavingengi sou ngamulinu 'ili'ilixo mulapu noxou Lataua, xo ta mitema ane imulinu 'ili'ilixo noxou Lataua, la imaisou Tila iou. 15 Ngalaxa'ingengi laixe, loxo 'o io se'i noxinge ine'e 'alai no anu alauna noxou Lataua si ka i'ume ilivu. Mo loxo 'o io vile noxinge uxali loxo ovu vile la uliu e masua ulu'elai no lia ne muxali no taingengi, la uxalixu tu'utu'umaxu noxinge la u'oxongengi ngaxali masua no iou Lataua. 16 ^gNgalaxa'ingengi laixe mo sou vile noxinge u'oxonu 'ili'ilixo sou vote'i mo uxiunu tumalou noxou Lataua loxo Esau mu'oxonu mamu. Anu muxavutala no anu la'ilali se kitu'asi, la mulotonu no anu tanixu loxo anu laposalaxu. 17 ^hNgingi ngelavusou lexe ili'i xe anu xavutalau muxiu sou uno'u alualu laixe noxou momu la umomomo uasi mo momu umasaxau uasi. Anu mutama sou lexe uno'u alualusou ia vote'i vile sou anu uxiunu opoonu sou u'isalilinoxu uasi.

18 ⁱIoxe, loxo ngingi la ngaxali no anu laxa'ilu mo ngakasou uao. Ia ane'i ta Isilaeli tatei mixali no laxa'ilu ne Sinai e ane'i mimomomo sou mixamulinu la mimaisou navu ilou isivoxo toxoxa'a xe la'ave. 19 ^jMo milomusou xolau mutama xe milomusou itema xolinu tila muvivikalane'i, la mi'ume manina. Ane'i milomusou aloxo ne la sou milinga pekia'u noxou Mosesi lexe, ane'i imasaxa lexe ilomu la uasi. 20 ^kXo ane'i mimama'u no anu vaikala ne. Vaikala ne aloxo 'o, “Lexe itema vile xe ta mimemimengi ta temene ilo'a ta vova mose'i ine'e ilaisou laxa'ilu 'o, la ngave'a no anu kulu mo isoisoli.” 21 ^lAne'i mimaisou la mi'olo'olo manina mo Mosesi kalumo. La muvikala lexe, “Eni e'ume xe e'olo'olo.”

22 Ia ngingi ne ngalai no anu mii vile aloxo ne uasi. Ngingi ngexali no laxa'ilu ne Sioni mo ngexali ne Ielusalemu teitexi no opo loxotolo no anu tuala tila noxou Lataua e uxolu umauli utotomu. Ngigni ngelai ngexali noxi'a ta angelo tavu'alo e tavu'alo manina ixoxolu ipita sou i'osa'osa no anu. 23 Mo ngexali no anu pita noxi'a ta laposalaxa'a e ualasi'a mikaukavunu muai teitexi no opo loxotolo. Ngingi ngexali noxou Lataua e utulusi'a ta mitema no anu vaivaikala, mo ngexali noxi'a ta ulene'i ta mitema misoisoli tatei e 'ilixone'i mulapu xe mixali laixe manina. 24 ^mMo ngexali noxou Iesu anu itema utulu nonixi sou u'oxonu pekia'usou 'ilixo sou opo vilesisi alavua, mo no anu sialuxu e mupeinusinge. Sialuxu ne muxalixu a'alo laixe mua'ulixu sialuxu Aveli.

25 ⁿLa sou ngalaxa'i laixe, mamu sou ngaxiunu tumalinge noxou Lataua e uvikala. Tatei no lialia 'o la Mosesi mulosi'a ta mitema vaikala pekia'u la ane'i imasaxa ilomusou mo imulinu uasi, la vote'i vile sou i'ume no anu lakolisou uasi. Ia Lataua muxolu teitexi no opo loxotolo mupeletotosinge ia nenge talomuxu vaikala uasi la texiunu tumalinge noxou. La sou loxovaa, nenge tamomomo sou ta'ume la tapoloxalonu 'ulusou susu noxinge ne? Uasisi manina. 26 ^oXo tatei xe muvivikala la xolinu mu'umu'umunu lialia. Ia vaimomo 'o Anu musakiinu vaikalasou aloxo 'o, “Alaxu vile la eni akunoxu lialia la, ia lialiasi uasi loxotolo kalumo.” 27 Lataua mulemolu lexe alaxu vile la Anu ukunoxu lialia ilou loxotolo la mimii e Anu mukoinu ne uxexee, ia mii ane ukunikuni uasi la anu uxolu.

28 La sou laixe lexe nenge talemolu laixe noxou Lataua mo talotu noxou no anu 'ilixo ane Anu mumasaxau mo ta'itinu ualasou mo tamama'usou la taxolu no laaxu. Xo nenge telavusou lexe nenge texolu no anu saxisaxila'u noxou, la saxisaxila'u noxou ne anu pumuxu manina. 29 ^pXo Lataua noxinge ne anu loxo navu ialuxu manina e u'elaxu mimii la u'ela avile.